Benedetta Maria (a Mamma nostra che ogge è fatta Reggina de lo Paradiso) Benedetta Maria e Chi l’ha fatta granne Regina de lo munno tutto: Isso se fece de suo ventre frutto, e co ragione mò cussì la tratta. Quanno la sente se nasconne e agguatta a lo nfierno fra Zurfo, lo frabutto! Superbio! maro te! comme sì brutto: tu no la può vedé ? Ma vidi e schiatta. Aggi pietà de me, povero affritto, Signò! confesso, songo stato matto: aiutami: si nò, so ghiuto ammitto. Vi, facimmo accossì: lo fatto e fatto; da mò nnante te servo fitto fitto, e tu me prieggi. Vi, ca và lo patto. 33 - Curri, curri (a Maria nelle tentazioni del demonio) Curri, curri, Mamma mia, curri priesto e non tardà! ca lo serpe (arrasso sia!) già me vole mozzecà. Manco l’aggio visto tutto, e me fa cossì tremà: Mamma, Mamma, comme è brutto! comme corre nsanetà! Io non pozzo e benco meno e non saccio come fà; mò me jetta lo beleno: Mamma mia, fa priesto, fa. Co li strilli e co li chiante non se vo proprio arrassà; songo stanco a chiammà sante, non ce sente e non se sta. O che vocca, che ave aperta! Maro me! me vo’ gnottì. S’è auzato allerta allerta: o Maria, fannello ji. Vidi, vì lo nomme tujo già l’ha fatto spaventà; ma pe cchiù tormento sujo, Mamma, tu vienence ccà. Come fuje! Ched’è stato? Chi lo fa precepetà? Serpe brutto e arraggiato, non ce puozzi cchiù accostà!