Giesù Cristo peccerille
(Su la Bellezza di Gesù Bambino)

1. Giesù Cristo peccerillo, 
mariuolo, acchiappa core, 
vuò lo mio? Te teccatillo,
tutto tujo, eccolo cchà.
Si i core de ll'aute gente
Po volisse, Ninno bello, 
fatte sulo tenì mente, 
ca li ffaje spantecà.

(risponde il popolo dopo ogni due strofe)

Bello Ninno mio d'amore,
Sulo a Te io voglio amà.
Ovvero
Bello mio, Ninno Dio
Io pe Te voglio abbruscià

2. So craune, e so bruttezza
tutti i gigli, e giusummine;
de sta Faccia la janchezza
fa li Sante addobbeà
Chi è lo Sole 'n Paraviso?
Ninno mio, è sta janchezza; 
chisto bello, e ghianco viso
mena luce 'nquantità.

3. Venc' e rrose o russolillo
de sti belle Mascarielle:
mille vase a pezzechillo, 
chi le bede, t'ha da dà.
Dint'a st'Ucchie sta 'nserrata
tutt' a lluce de le stelle:
chi da st'Ucchie è smecceato
già è feruto, e t'ha da amà.

4. Sso Nasillo delecato,
sti Zuppulle de diamante, 
sto Mussillo de scarlate, 
fanno a bracce 'nnamorà.
Sta Vocchella quanno sciata
scarfe l'arma cchiù annevata;
quanno dice na parola
de l'amore fa squaglià.

5. So catene sti Capille
So manette, e cippe d'oro
Ca perrò so ricciolille,
cumm'e chille de mammà.
So doje perle ste Mammelle
chiene e frezze, e calamite
Chi le bede accossì belle, 
corre a farese frezzeà.

6. So piguelle d'uva bona
sti Pedille, Ninno amato
chi le basa, 'mbriacato, 
e 'mpazzuto ha da restà
'N somma Tu sì tanto bello, 
Ninno russo e ghiancolillo,
che li belle a mill' a millo
Ponno irese a stepà.

7. Si de carte tutt'o cielo,
tutt'e paglie penne toste,
e si tutte l'acque gnioste, 
le facisse arreventà.
Pe notà quant'è bellillo
sulamente no Detillo:
No sta carta, manco a ppenne
né sta gnosta pò avastà.

8. Quant'è caro, tiene mente!
Si mm' ancappe int' a sse mane,
siente, Ninno, e tien' a mente, 
me ne voglio sazeà.
Ne vuò avè vase, e morzelle
a sti piede, e a ste mmanelle; 
'n faccio po, nò nne parlammo,
io mme t' aggio da sbramà.

9. Pare troppo confidenzia,
ma Tu saccio, ca n' haje gusto,
e perrò no 'nc'è perdenzia
de creanza, e majestà.
Quant' è sciocco chi te lassa
pe cercà aute bellizze;
lassa o mare pe li sghizze, 
che no juorno hann' a seccà.
(segue la bellezza interna di Gesù) 

10. Già io comm' a peccerillo
'n faccia a o ghianco, o a russolillo,
a e bellizze de sso Cuorpo
mme so puoste a pazzeà.
Ma Tu sì comm' o granato
addoruso, e tutto pinto; 
lo cchiù bello sta da dinto, 
lo sapore, dinto stà.

11. Tiene n'Arma la cchiù bella, 
che Tu agge maje creata ;
chesta appassa pure chella,
che creaste pe mmammà.
Chi è no schizzo de bellezza, 
chi è na giarra, e chi no cato
mamma è maro sprofunnato:
st' Arma toja po che sarrà?

12. Già m' agghiaja la bellezza
de sso cuorpo, e ss' Arma bella;
che sarrà. si penzo a chella 
bella toja Devenetà!
Ninno mio, Tu si de Dio
Lo bellissimo Figluiolo; 
le bellizze tuoje Tu sulo
le ccapisce, e puoje contà.

13. Dillo Tu a chi mme sente,
Ninno mio, quanto si bello; 
giacché 'n cielo sulamente
sse bellizze vuoje mostà.
Ca mo vide 'nnanz' a Tene 
comm' a ffruvole li core
E chi sciocco nò nne tene 
mo lo vide pecceà.

14. Te lo mio.... ah marionciello,
doce doce m'haje ferito,
e annascuso si trasuto
chisto core a pezzecà....
Lengua sciocca, chi è Signore
non se chiamma marionciello:
Ninno o fece chisto core
justo pe se 'nce spassà....

15. Ma che spasso te pò dare, 
Ninno mio, si è tuosto o core!
T'aggio 'ntiso: li ferrare
sanno o ffierro annammollà.
Tienetillo, bella Gioia, 
ma pecchè ca tene e scelle, 
dallo 'mmano a mamma toja,
e fatillo 'ncatenà.

16. Pensa a quanto nce haje stentato
p'ancapparlo a la tagliola;
dunca mo, che 'nce 'ncappato,
non t'o fare cchiù scappà.
Tienetillo sempe 'n pietto, 
ard', e abbruscia a gusto tujo:
no le fa trovà arrecietto, 
fallo sempe spantecà.

17. Si volesse pò fuire
E tu auza li strille,
e co scippe; e co caucille
'nnanz' a Te fallo schiattà.
Fall' a mente, ca o nnemmico
lo promette gusto, e mele:
ma po auto, che lo fele, 
spine, e tuosseco non dà.

18. Tu si mele, Tu confitto,
Tu si zuccaro a panetto:
Chi te prova veramente, 
non te pò maje cchiù lassà 
Ha da fa comm' a moschella,
Tu fajo sciò, nna cacce, e chella 
cchiù s'azzecca, e se contenta 
de se fare scamazzà.

19. Si sto core, Ninno bello,
chi partì da Te no faje; 
dall'amore tujo chi maje
scatastarme potarrà?
No 'nce ponno guaje, e pene; 
non me smove manco a morte, 
ca l'amore tujo cchiù forte
de no scuoglio mme farrà.

20. E pecchè non tengo o core, 
lo serpente 'nganantore
co li tacere, si vene,
la fatica perderà:
E si vene o brutto amore;
e mme mena a frezza 'mpietto
non farà pertuso a o core, 
coffeato restarrà.

21. E si po veness' o munno,
e decesse: i' voglio amore: 
le responno: no, nc'è core;
agge pace, fatte llà.
Ninno mio, Rre de sto core,
giacché tanto te piace, 
guodetillo sempre 'n pace.
co lo Gnore, e co mammà.

22. Tu ti tien 'o core mio, 
d'int'o core tutt' amore; 
tutto tujo già song'io, 
cchiù non aggio che te dà:
Tu perrò, Ninno d'amore, 
duje piacire m'aje da fare;
'n primmo, a o pizzo de lo core, 
Tu pe ccarè nce haje da stà.

23. E po quanno me ne moro
famme zinno co a manella; 
dimme po co sta vocchella:
“Pisse pisse, viene ccà”.
Ca volanno io me ne vengo;
mme t'abbraccio, e me te vaso;
e co Ttico me ne traso
'n Paraviso a pazzeà.